Шілде айындағы ыстық Алматы жедел жәрдем қызметін шамадан тыс жүктеді. Екі апта ішінде қалада ондаған мың шақыру тіркелді. Жоғары температура алматылықтардың созылмалы ауруларының өршуіне әкеліп, қан қысымы мен жүрек проблемаларына байланысты мыңдаған өтініш тіркелді, ондаған науқас инсультпен ауруханаға жедел жеткізілді. Бұл туралы Qazaqyia.kz порталы Kursiv Media басылымына сілтеме жасап хабарлайды.
Алматы жедел жәрдем қызметі директорының міндетін атқарушы Азамат Құрманбековтің хабарлауынша, тек шілденің алғашқы екі аптасында 33,6 мың шақыру түскен. Оның 1,5 мыңы қан қысымының жоғарылауына, тағы 300-і жүрек-қан тамырлары ауруларына, оның ішінде жүректің ишемиялық ауруы мен жедел миокард инфарктісіне байланысты болған. Сонымен қатар, ми қан айналымының жедел бұзылуымен 50-ге жуық науқас ауруханаға жедел жеткізілген.
Сондай-ақ, жедел жәрдем шақыруды қажет еткен ыстық соғу жағдайларының саны екі есеге артқаны атап өтілді.
Мегаполис денсаулық сақтау басқармасы ыстықтың сусыздану, тамақтан улану, ішек инфекциялары қаупін арттыратынын және маусымдық аллергияның көріністерін күшейтетінін еске салды.
«Созылмалы аурулары бар науқастарға өз жағдайына ерекше назар аудару ұсынылады. Олар дәрігердің тағайындауларын қатаң сақтауы, дәрі-дәрмектерді үнемі қабылдауы, қан қысымы мен қандағы қант деңгейін бақылауы, қызып кетуден аулақ болуы және жоспарлы консультацияларды өткізіп алмауы керек», — делінген хабарламада.
Дәрігерлер мүмкіндігінше сағат 11:00-ден 17:00-ге дейін тікелей күн сәулесінің астында болмауға, табиғи маталардан жасалған жеңіл киім, бас киім және күннен қорғайтын көзілдірік тағуға кеңес береді.
Сусын режимін сақтау маңызды. Медициналық қарсы көрсетілімдер болмаған жағдайда ересектерге күніне кемінде екі литр су ішу ұсынылады, алкоголь, тәтті газдалған сусындар мен көп мөлшердегі кофені шектеу керек.
«Қатты бас ауруы, бас айналу, әлсіздік, жүрек айну, сананың шатасуы, дене температурасының жоғарылауы немесе естен тану пайда болған кезде адамды дереу салқын жерге жылжыту, денені салқындатуды бастау, суды кішкене жұтыммен беру және жедел жәрдем шақыру қажет», — деп кеңес береді медиктер.
Ыстық Қазақстанның көп бөлігінде бірнеше апта бойы сақталуда. Айта кетейік, биыл жазда Астанада бір температуралық рекорд жаңартылды. 23 маусымда ауаның максималды температурасы +36,8°C-қа жетіп, осы күнге арналған алдыңғы рекордтан 0,4°C-қа асып түсті.