Алматының Медеу ауданында патрульдік полицейлерден қашпақ болған ер адам ұсталды. Қуғын барысында ол ішінде марихуана болуы мүмкін ірі көлемдегі зат бар сөмкені лақтырып жіберген. Ұсталған адамның өзі бұл заттың қара нарықтағы құнын шамамен 500 млн теңге деп бағалаған. Бұл туралы Qazaqyia.kz порталы Kursiv Media басылымына сілтеме жасап хабарлайды.
Оқиға Керей–Жәнібек хандар көшесінде болған. «Буран-613» экипажының патрульдіктері жеке секторда күдікті жас жігітті байқаған.
Полицейлерді көрген ер адам қозғалыс бағытын күрт өзгертіп, қашпақ болған. Жүгіріп бара жатып ол киімін шешіп, лақтыра бастаған, сондай-ақ сөмкесінен де құтылған.
«Патрульдіктер оның кетуіне жол бермеді. Ер адам бұғатталып, ұсталды», — деп хабарлады полицияда.
Лақтырылған сөмкеден өзіне тән иісі бар өсімдік тектес заттың ірі партиясы табылды. Алдын ала деректер бойынша, бұл марихуана болуы мүмкін. Тәркіленген заттың нақты құрамы мен массасын сот-химиялық сараптама анықтайды.
Құқық қорғау органдары хабарлағандай, ұсталған адам есірткіні одан әрі таратуға арналғанын алдын ала мойындаған. Оның қара нарықтағы ықтимал құнын шамамен 500 млн теңге деп бағалаған.
Оқиға орнына Медеу ауданы полиция басқармасының қызметкерлері мен тергеу-жедел тобы келді. Зат тәркіленіп, сараптамаға жіберілді. Болған оқиға фактісі бойынша сотқа дейінгі тергеу басталды.