Алматыда полиция қызметкерлері көшеде пышақпен жүрген ер адамды ұстады. Оны медиктерге тапсырып, мамандандырылған мекемеге жатқызды. Бұл туралы Qazaqyia.kz порталы Kursiv Media басылымына сілтеме жасап хабарлайды.
Оқиға 30 тамызда Бостандық ауданында болды. Полицияға пышақ ұстаған ер адам туралы хабарлама түсіп, оқиға орнына экипаж жіберілді.
«Келген қызметкерлер ақпаратты растап, азаматтардың қауіпсіздігін қамтамасыз етті. Ер адам ұсталып, жедел жәрдем бригадасына тапсырылды. Оның психикалық денсаулық орталығында есепте тұрғаны анықталып, кейін мамандандырылған медициналық мекемеге жатқызылды», — деп хабарлады Алматы қалалық полиция департаменті.
Полиция қазіргі уақытта қоршаған ортаға ешқандай қауіп жоқ екенін атап өтті.
Бұған дейін алматылық Анастасия Султанова Threads әлеуметтік желісінде ер адамның аудан тұрғындарын бірнеше рет мазалағанын, мүлікке зақым келтіргенін және өтіп бара жатқандарға қауіп төндіргенін айтқан. Оның сөзінше, көршілер бұған дейін әртүрлі инстанциялар мен полицияға жүгінген.
Автор сондай-ақ ер адамның балаларға зиян келтіру ниеті туралы айтып, №70 және №189 мектептерді атағанын жазды. Ол бейнежазбалардың бірінде оның жол жөндеу жұмыстарымен айналысқан жас жігіттерге пышақпен қауіп төндіргенін айтты.
Полиция департаменті тұрғындарды сабырлық сақтауға, тексерілмеген ақпаратты таратпауға және осындай жағдайлар туындағанда 102 нөміріне хабарласуға шақырды.
Бұған дейін «Курсив» Астанадағы ұқсас оқиға туралы жазған болатын. Abu Dhabi Plaza сауда орталығында 19 жастағы жігіт пышақпен ұсталып, куәгерлердің айтуынша, ол бутік қызметкерлеріне қауіп төндірген. Полиция оны мән-жайды анықтау үшін басқармаға жеткізіп, кейін жедел жәрдем шақырып, әкесіне тапсырғанын хабарлады.
Abu Dhabi Plaza әкімшілігі қауіпсіздік қызметі оқиғаға жедел әрекет етіп, құқық қорғау органдарын шақырғанын мәлімдеді. Зардап шеккендер туралы ақпарат түскен жоқ.