Алматыда 22 жастағы жігіт метро станциясында қауіпті зат туралы әзіл айтып, 5 тәулікке қамалды. Бұл туралы Qazaqyia.kz порталы Kursiv Media басылымына сілтеме жасап хабарлайды.
Оқиға «Райымбек» метро станциясында болған. Жігіт қауіпсіздік қызметкеріне өз сөмкесінде қауіпті зат бар екенін айтқан. Бұл ақпарат дереу полицияға жеткізіліп, оқиға орнына құқық қорғау органдарының қызметкерлері келіп, аумақты тексерген.
Тексеру барысында ешқандай қауіпті немесе тыйым салынған заттар табылмаған. Кейін жігіт бұл сөздерді әзіл ретінде айтқанын мойындаған.
Алматы қаласының мамандандырылған ауданаралық әкімшілік құқық бұзушылықтар жөніндегі соты жігітті кінәлі деп танып, оған 5 тәулік мерзімге әкімшілік қамауға алу жазасын тағайындаған.
Полиция мәлімдемесінде: «Кез келген жалған хабарламалар, олар үрей тудыруы немесе қауіпсіздік қызметтерінің жұмысын дезорганизациялауы мүмкін — бұл әзілге себеп емес. Әрбір осындай өтініш міндетті түрде тексеріледі, ал кінәлілер жауапкершілікке тартылады», — делінген.
Бұған дейін «Курсив» Астанада 23 жастағы қыздың әлеуметтік желілерге арналған контент түсіру кезінде жол белгісін пилон ретінде пайдаланғаны үшін әкімшілік жауапкершілікке тартылғанын жазған.