Алматыдағы «Қазақфильм» аумағында кинематография тарихы мен кино қайраткерлеріне арналған саябақ ашылады. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
Саябақ 5,5 гектар аумақта орналасқан ашық қоғамдық кеңістік болады. Бұл туралы премьер-министрдің орынбасары – мәдениет және ақпарат министрі Аида Балаеваның Алматыға жұмыс сапарының қорытындысы бойынша белгілі болды.
Министрдің мәлімдемесі
«Өкінішке қарай, ұлттық киностудияны әдейі банкроттыққа жеткізуге әрекет жасалды. Соның салдарынан «Қазақфильм» іс жүзінде қатардағы продюсерлік компаниямен теңестіріліп, одан айырылып қала жаздадық. «Қазақфильмді» сақтау үшін заңнамалық деңгейде қолдау шаралары қабылданды. Оның ішінде киностудияны тікелей мемлекеттік қаржыландыру да қарастырылған», — деді Аида Балаева.
Жоспарлар мен тарих
Оның айтуынша, 2027 жылы киностудия павильондарын жөндеуге кірісу жоспарланып отыр. Қазақстандағы ең ірі киностудия 1934 жылы құрылған. 1941 жылы Қазақ КСР-іне эвакуацияланған «Мосфильм» мен «Ленфильм» киностудиялары Алматы киностудиясының құрамына қосылды.