Алматыда екі ер адам өздеріне жедел жәрдем шақыртып, келген медицина қызметкерлерін пышақпен қорқытқан. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
Оқиға туралы полицияға екі ер адамға шақырту бойынша келген жедел жәрдем бригадасы хабарлаған. Казыбек би және Бәрібаев көшелерінің қиылысына патрульдік полиция қызметкерлері мен Медеу аудандық полиция басқармасының учаскелік инспекторы жедел жетіп, екі ер адамды да ұстады.
Алдын ала мәлімет бойынша, олардың есірткіге масаң күйде болғаны анықталды. Ұсталғандардың өздері медицина қызметкерлері келгенге дейін синтетикалық есірткі қолданғандарын айтқан.
Жедел жәрдем қызметкерлерінің ешқайсысы зардап шеккен жоқ. Ұсталғандар полиция бөлімшесіне жеткізілді. Қазір оқиғаның барлық мән-жайы, оның ішінде пышақтың қайдан алынғаны, сондай-ақ оны сақтау және алып жүру мақсаты анықталуда.
Әр адамның әрекетіне құқықтық баға беріледі, дейді тәртіп сақшылары.