Алматыда «Халық қатысуының бюджеті» бағдарламасы бойынша қоғамдық кеңістіктерді абаттандыру жалғасуда. Бұл жолы жұмыстар Алмалы ауданындағы Чайковский көшесінің Қазыбек би және Айтеке би көшелері аралығындағы учаскеде жүріп жатыр. Бұл туралы Qazaqyia.kz порталы Kursiv Media басылымына сілтеме жасап хабарлайды.
Аудандық әкімдіктің хабарлауынша, жобаны тұрғындардың өздері ұсынған.
«0,6 га аумақта демалыс пен серуендеуге ыңғайлы жаяу жүргіншілер аймағы құрылуда. Көгалдандыруға 0,4 га бөлінген: мұнда көгал төселіп, көпжылдық бұталар отырғызылып, бұрын болмаған автоматты суару жүйесі орнатылуда», – делінген хабарламада.
Тағы 0,2 гектар жолдарды жаңартуға бөлінген. Жұмысшылар шамамен 1000 шаршы метр брусчатка және 250 шаршы метр асфальт төсеуде. Сондай-ақ, көлеңкелі шатыр, пергола және 27 жаңа шам пайда болады. Жарықтандыру үшін шамамен 400 метр кабель желісі тартылған.
Тұрғын Жанат Изжанованың айтуынша, абаттандырудан кейін аумақ әлдеқайда жайлы бола бастаған.
«Біз нәтижеге өте ризамыз. Біздің аула әрқашан тұрғындардың сүйікті орны болды, енді одан да жақсы болды. Автополив, ыңғайлы орындықтар пайда болды, спорттық және балалар алаңдары жаңартылды. Абаттандырудың арқасында мұнда нағыз саябақ сезімі пайда болды. Осындай жұмыс үшін рахмет», – деді ол.
Еске салайық, «Халық қатысуының бюджеті» бағдарламасы алматылықтарға өз аудандарын абаттандыру бойынша идеяларды өздері ұсынуға мүмкіндік береді. Тұрғындар жобаны дауысқа сала алады, егер ол жеткілікті қолдау жинаса, қала оны іске асыруға ақша бөледі.
Бұған дейін «Курсив» Алматы қарқынды жаңарып жатқанын жазған болатын — қалада жаңа мектептер, қоғамдық кеңістіктер пайда болып, жаңа инфрақұрылым салынуда. Оңтүстік астананың Алатау ауданының әкімі Данияр Кирикбаев журналистерге 2000 орындық жаңа мектепті, 3,5 га аумақтағы салынып жатқан скверді және Теректы шағын ауданының шамамен 9 мың тұрғынын сумен және кәрізбен қамтамасыз етуі тиіс инженерлік желілер жобасын көрсеткен.