Алматыда ашық аспан астында кинокөрсетілімдер өткізуге арналған амфитеатры бар «Қазақфильм» паркін құру жоспарланып отыр. Жаңа кеңістік жасау жоспарымен қала әкімдігі бөлісті. Бұл туралы Qazaqyia.kz порталы Kursiv Media басылымына сілтеме жасап хабарлайды.
Жаңа кино-парк қандай болады
Жаңа кино-парк отандық кино тарихына арналған жаңа қоғамдық кеңістік ретінде ойластырылған. Бұл мәдениет пен қалалық өмір тоғысқан кеңістік болады. Паркті серуендеуге, дем алуға және отандық кинематографпен танысуға арналған заманауи орынға айналдырғысы келеді.
«Жобада тақырыптық аймақтар, серуендеу аллеялары, интерактивті және мультимедиялық инсталляциялар, балалар кеңістігі және демалыс аймақтары жоспарланып отыр», — деп хабарлады оңтүстік астана әкімдігінде.
Сонымен қатар қазақстандық кино тарихын заманауи форматта баяндау ұсынылып отыр. Келушілер отандық киноиндустрияның дамуы, культті фильмдер және елдің мәдени мұрасы туралы біле алады.
Парк аумағында кинокөрсетілімдер, тақырыптық кездесулер және мәдени іс-шаралар өтеді.
«Егер жоба жүзеге асырылса, Алматыда қазақстандық кино тарихы қызықты, қолжетімді және заманауи түрде ұсынылатын жаңа орын пайда болады», — деп қорытындылады қала әкімшілігінде.
Жобаны кім әзірлейді
Жобалау-сметалық құжаттаманы әзірлеуші — «ENVICON-А» ЖШС, ол сондай-ақ Панфилов жаяу жүргіншілер көшесі мен Арбатты абаттандыру жобасын жасаған. Жұмыс мердігері ретінде «Seven Stroi Development» ЖШС таңдалды. Құрылтайшысы — Ерік Өтепов, ол сондай-ақ Алматыда тіркелген бірнеше қазақстандық компаниямен байланысты.
Жобаның нақты құны әзірге аталмайды, себебі құжаттама әлі түзетіліп жатыр. Паркті жеке инвестициялар есебінен жүзеге асырғысы келеді, бірақ инвестор әлі табылған жоқ.
Шу мәселесі қалай шешіледі
Бұған дейін «Курсив» ашық кинотеатрдың шуынан көрші үйлердің тұрғындарын қорғау үшін парк аумағы аймақтарға бөлініп, ағаштар отырғызылатынын жазған. Сондай-ақ паркте фудкорттар мен сауда нүктелері орнатылады деп уәде етілген.