Әлеуметтік желілерде 12 жасар қыздың қатысуымен жасалған бейнежазба таралуда, онда ол 75 жастағы әжесімен бірге алаяқтардың әрекетінен жалғыз баспанасынан айырылып, көшеде қалғанын айтады. Бұл туралы Qazaqyia.kz порталы Kursiv Media басылымына сілтеме жасап хабарлайды.
Жарияланымдарда атап өтілгендей, оқиға Алматының Бостандық ауданында болған. Бейнежазба авторының сөзінше, үйден шығарылғаннан кейін қарт әйелге медициналық көмек қажет болып, оны ауруханаға жеткізген.
Бейнежазбадағы қыз баланың айтуынша, олар балалар құқығын қорғайтын бір ұйымға көмек сұрап жүгінген, бірақ дөрекі қарым-қатынасқа тап болған. «Мен оған бәрінің қалай болғанын айтпақ болдым. Ал ол: «Осылай алданып, ақша беру — бұл ғарыштық деңгейдегі ақымақтық» деп айта бастады. Ол сөзін аяқтамады, бірақ нені меңзегені түсінікті еді. Содан кейін біз бұған көніп, үйімізден бас тартуымыз керек деді», — деп әңгімелейді қыз бейнежазбада.
Бірқатар БАҚ-тың хабарлауынша, бұл оқиға кеңінен танымал болғаннан кейін, Қазақстанның балалар омбудсмені Динара Закиева мәселеге араласқан. Іс бақылауға алынғаны хабарланады.