Алматы қаласының Полиция департаментінің мәліметінше, өткен түні Алатау ауданындағы тұрғын үй кешенінің 10-қабатынан 20 жастағы қыз құлаған. Құлау кезінде ол бірінші қабаттың металл шатырына соғылып, содан кейін жерге түскен. Бұл туралы Qazaqyia.kz порталы Kursiv Media басылымына сілтеме жасап хабарлайды.
«Зардап шеккен қыз шұғыл түрде ауруханаға жеткізілді. Қазіргі уақытта оның жағдайы ауыр, дәрігерлер оның өмірі үшін күресуде», — деп хабарлады полиция.
Алдын ала мәліметтер бойынша, оқиғаға дейін қыз бен оның жігіті арасында жанжал болған. Барлық мән-жайлар анықталып жатыр.
Бұған дейін «Курсив» Алматыда әйелдің бесінші қабаттан құлап қайтыс болғаны туралы жазған. Қайғылы оқиға 5 маусымда түн жарымында Наурызбай ауданында болған. Полицияның алдын ала мәліметі бойынша, қайтыс болған әйел 1988 жылы туған.
Осы факті бойынша Наурызбай ауданының полиция басқармасы қылмыстық іс қозғады. Қазіргі уақытта қажетті тергеу шаралары жүргізілуде.
Полиция қайтыс болған әйелдің осы тұрғын үй кешенінің тұрғыны болғанын хабарлады. Алдын ала ақпарат бойынша, соңғы кездері ол жеке жағдайларға байланысты ауыр эмоционалдық күйде болған.