Алматы соты бұрынғы священник Иаков Воронцовқа қатысты іс бойынша үкім шығарды. Ол психотроптық затты заңсыз сатып алу және сақтау бойынша кінәлі деп танылды. Амнистияны ескере отырып, оған төрт жыл бас бостандығынан айыру жазасы тағайындалды. Бұл туралы Qazaqyia.kz порталы Kursiv Media басылымына сілтеме жасап хабарлайды.
Істі Алматының Медеу аудандық № 2 соты қарады. Сот процесі 16 қыркүйекте басталып, жабық есік жағдайында өтті.
Сот деректері бойынша, Воронцов тұрған үйде тінту кезінде психотроптық зат меткатинонның аналогы — 3-CMC-нің 2,44 граммы табылды. Бұл мөлшер ерекше ірі көлем ретінде сараланды. Воронцов затты сату мақсатынсыз сатып алу және сақтау бойынша айыпталды.
Сот оның кінәсі куәгерлердің айғақтарымен, сараптама нәтижелерімен, тінту хаттамасымен және істің басқа да материалдарымен расталғанын мәлімдеді.
Бастапқыда Воронцовқа алты жыл бас бостандығынан айыру жазасы тағайындалды. Кейін Қазақстанның жаңа Конституциясын қабылдауға байланысты амнистия туралы заң қолданылды.
«Жаза үштен бірге қысқартылып, түпкілікті түрде 4 жыл бас бостандығынан айыру мөлшерінде белгіленді», — делінген сот хабарламасында.
Үкім әзірге заңды күшіне енген жоқ.
Еске салайық, РПЦ-нің бұрынғы священнигіне қарсы қылмыстық іс желіде Воронцов болжам бойынша өз қолымен жасалған шегу құрылғысын пайдаланып, есірткі затын дайындап, қолданып жатқан бейнежазба пайда болғаннан кейін қозғалған.
Сотта 2026 жылғы 13 ақпандағы медициналық куәландыру Воронцовтың каннабиноидтарды қолданғанын анықтағаны хабарланды. Бұған дейін оларды медициналық мақсаттан тыс қолданғаны үшін оған 10 тәулік әкімшілік қамау тағайындалған болатын.