Алматы облысының әкімдігі Тургендегі авариялық көпірді қалпына келтіру жұмыстары басталғанын хабарлады. Бұл көпір бірнеше апта бұрын қатты жаңбырдан кейін өзеннің жағасынан асып, су тасқыны кезінде қираған еді. Бұл туралы Qazaqyia.kz порталы Kursiv Media басылымына сілтеме жасап хабарлайды.
Көпірдің 2024 жылы-ақ авариялық деп танылғаны анықталды. Құрылыс жұмыстарын үш ай ішінде аяқтау жоспарланған. Бүгін Алматы облысының әкімі Марат Сұлтанғазиев арнайы нысанға барып, құрылыс барысымен танысты.
Қазіргі уақытта нысанда төрт бірлік техника жұмыс істеп, оннан астам маман жұмылдырылған. Көпір құрылысы бір апта бұрын басталды. Демонтаж жұмыстары толық аяқталып, бұрғылау жұмыстарына дайындық жүргізілуде. Мердігердің айтуынша, нысанды қараша айында толық пайдалануға беру жоспарланған.
«Бұл көпір тұрғындар үшін де, туристер үшін де маңызды. Сондықтан жұмыс сапасына және құрылыс мерзімдерінің сақталуына ерекше назар аудару қажет. Жобаның әрбір кезеңінде барлық техникалық талаптар қатаң орындалуы тиіс», — деп атап өтті өңір басшысы.
Бұған дейін «Курсив» сел салдарынан Турген өзені Алматы облысы Еңбекшіқазақ ауданындағы Ассы үстіртіне баратын жолды су басқанын жазған болатын. Құтқарушылар осы аудандағы Турген шатқалынан 42 адамды, оның ішінде үш баланы эвакуациялады.