Алматы облысында биыл білім беру саласына 458 млрд теңге бөлінді, деп хабарлайды облыс әкімдігі. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
Оқулық қорын толықтыруға 3,3 млрд теңге қарастырылған. Жаңа оқу жылында әлеуметтік осал санаттағы 63 мың оқушыға мектеп формасы мен оқу құралдары беріледі.
«Мектепке жол» акциясы
«Мектепке жол» акциясы аясында демеушілердің көмегімен 18 мың балаға қолдау көрсетіледі. Сонымен қатар 185 мың оқушы тегін ыстық тамақпен қамтылады, деп жазылған хабарламада.
Оқушыларды тасымалдау
Шалғай елді мекендердегі оқушыларды тасымалдауға 3 млрд теңге бөлінді. Бұл қаражат 29 мыңнан астам баланы тасымалдауды қамтамасыз етуге бағытталған.
Жаңа мектептер
Алматы облысында үш ауысымды оқытуды жою мақсатында соңғы төрт жылда 75 жаңа мектеп салынып, 6 мектепке қосымша жапсаржай салынды. Оның ішінде мемлекет қолдауының арқасында жалпы 24 900 орынға арналған 26 «Келешек мектебі» ашылды.
Сонымен қатар 10 мектепте күрделі жөндеу жұмыстары аяқталды. Тағы екі нысанды жыл соңына дейін пайдалануға беру жоспарланып отыр.