17 қазанда Алматы мен Қазақстанның тағы бес қаласында қолайсыз метеорологиялық жағдайлар (НМУ) күтіледі. Бұл туралы Qazaqyia.kz порталы Kursiv Media басылымына сілтеме жасап хабарлайды.
Синоптиктердің деректері бойынша, НМУ Алматы мен Ақтөбеде, ал түнде Қостанай, Қарағанды, Теміртау және Астанада болжанады.
Мамандардың түсіндіруінше, қолайсыз метеожағдайлар тымық ауа райы, әлсіз жел, тұман және температуралық инверсияның үйлесуінен туындайды. Нәтижесінде ластаушы заттар атмосфераның жерге жақын қабатында жинақталып, ауа сапасының нашарлауына әкелуі мүмкін.
Синоптиктер мұндай кезеңдерде денсаулыққа теріс әсер ету қаупі артатынын, әсіресе созылмалы аурулары бар адамдар үшін қауіпті екенін ескертеді.
Ауаның ластану деңгейіне жел жылдамдығы, жауын-шашын, ылғалдылық және ауа температурасы әсер етеді.
Тұрғындарға, әсіресе автожолдар мен ластанудың басқа да көздерінің жанында, көшеде болу уақытын қысқарту ұсынылады. Балалар мен жүкті әйелдерге ұзақ серуендеуден бас тартуға кеңес беріледі.
Тыныс алу және жүрек-қан тамырлары аурулары бар адамдарға, сондай-ақ аллергиясы барларға қажетті дәрі-дәрмектерді өздерімен бірге алып жүру ұсынылады. Мамандар ашық ауадағы дене белсенділігін шектеп, мүмкіндігінше жаттығуларды жабық үй-жайларға көшіруді ұсынады.
Бұған дейін «Курсив» Қазақстанның 17 өңірінде 17 қазанға арналған дауылды ескертулер жарияланғанын жазған. Синоптиктер қар, көктайғақ, шаңды дауыл және қатты жел болжайды. «Қазгидромет» болжамына сәйкес, түнде Жетісу облысында температура −8 градусқа дейін төмендейді.