Мемлекет басшысы Қасым-Жомарт Тоқаевтың тапсырмасы бойынша Алматы ипподромы қаланың коммуналдық меншігіне қайтарылды, деп хабарлады қала әкімдігі. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
Ипподром тарихи және спорттық мақсаты сақтала отырып, біртұтас кешен ретінде қалады. Аумақтың функционалдық аймағын және жер учаскесінің нысаналы мақсатын өзгерту көзделмейді.
Келесі кезең — дамыту тұжырымдамасы
Әкімдік хабарламасында: "Келесі кезең — ипподромды дамыту тұжырымдамасын әзірлеу. Оның спорттық функциясын қалпына келтіру, инфрақұрылымын жаңғырту, трибуналарды, ат қораларды, спорт жолдары мен инженерлік желілерді жаңарту жоспарланып отыр", - деп жазылған.
Тарихи нысан
1930 жылы құрылған Алматы ипподромы Қазақстан мен Орталық Азиядағы ат спортының ежелгі нысандарының бірі саналады. Оның аумағы – 39,1 га.
Жаңғырту жоспары
Кешен айтарлықтай тозғандықтан, қалпына келтіру жұмыстары кезең-кезеңімен жүргізіледі. Жаңғыртудан кейін ипподром негізгі мақсаты бойынша пайдаланылып, онда қалалық және республикалық жарыстар өткізіледі.