Алматылық блогер Санат Ауелтай Қазақстандағы төрт танымал АЖС желісіндегі — Helios, Sinooil, Qazaq Oil және Royal Petrol — бензин сапасын тексерді. Ол АИ-92, АИ-95 және АИ-98 маркалы бензин сатып алып, портативті октанометр көмегімен октан санын өлшеді. Бұл туралы Qazaqyia.kz порталы Kursiv Media басылымына сілтеме жасап хабарлайды.
Нәтижелерді блогер өзінің әлеуметтік желілеріндегі видео арқылы жариялады. Көрсеткіштер әртүрлі болды: кейбір үлгілерде октан саны мәлімделгенге сәйкес келсе, басқаларында жоғары немесе төмен болып шықты.
Royal Petrol желісіндегі нәтижелер
Бірінші болып Royal Petrol желісінің жанармай құю бекеті тексерілді. Мұнда АИ-92 октан саны 93, АИ-95 — 97, ал АИ-98 — 104 көрсетті.
Ашық дереккөздерге сәйкес, АИ-98 үшін 104 көрсеткіші отынның детонацияға төзімділігі мәлімделгеннен жоғары екенін білдіруі мүмкін. Дегенмен, портативті октанометрдің нәтижесіне өлшеу әдісінің ерекшеліктері, қоспалар және температура да әсер етуі мүмкін.
Сонымен қатар, октан саны бензиннің жалпы сапасын көрсетпейді — ол тек детонацияға төзімділігін сипаттайды. Сондықтан, мысалы, АИ-95 көрсеткіші 97 немесе АИ-92 көрсеткіші 93 болса, бұл міндетті түрде сапалы отын емес: онда қоспалар немесе сапасыз присадкалар болуы мүмкін.
Helios желісіндегі тексеру
Helios АЖС-да блогер АИ-92, АИ-95 және АИ-95 Prime маркаларын тексерді. Нәтижелер сәйкесінше 90, 95 және 96 болды.
Видео астында желі өкілдері автордан байланыс деректерін қалдыруды сұрады.
«Біз міндетті түрде анықтаймыз», — деп жазды Helios өкілдері.
Sinooil және Qazaq Oil нәтижелері
Sinooil жанармай құю бекетінде АИ-92 — 91, АИ-95 — 96, ал АИ-98 — 105 көрсетті.
Соңында, Qazaq Oil желісінде АИ-92 октан саны 91, ал АИ-95 (Tulpar-95) — 97 болды.
Блогер Алматыдағы басқа АЖС-да тексеруді жалғастыруға уәде берді.
Бұған дейін Курсив Авто тюмендік журналистің Қазақстан мен Ресейдегі бензинді салыстыруы туралы жазған болатын.