Алабама штатындағы сот The New York Times газетін колледж баскетболшысы туралы қате ақпарат таратқаны үшін жала жабуда кінәлі деп танып, 9,25 миллион доллар көлемінде өтемақы төлеу туралы шешім шығарды. Бұл туралы Qazaqyia.kz порталы Associated Press басылымына сілтеме жасап хабарлайды.
Алабама университетінің ерлер командасында ойнаған Кай Спирс 2023 жылы The New York Times газетін сотқа берген еді. Газет тергеуге жақын адамға сілтеме жасап, Спирстің атыс кезінде көлікте болғанын хабарлаған. Алайда кейін газет қателігін мойындап, мақаланы түзеткен.
Сегіз адамнан тұратын алқабилер палатасы тоғыз күнге созылған сот процесінен кейін үкім шығарды. Спирстің адвокаты Мэтт Гловер бұл шешімге ризашылық білдіріп, бұл үкім бүкіл елдегі журналистиканы жақсартады деп сенетінін айтты.
The New York Times өкілі Чарли Штадтландер сот шешіміне қанағаттанбайтынын білдірді. Оның айтуынша, газет адал қателік үшін кінәлі деп танылғанына өкінеді, бірақ үкім мен өтемақы мөлшері заңға қайшы және дәлелдемелермен расталмаған.
2023 жылғы қаңтардағы атыс оқиғасы кезінде мектептің тағы үш баскетболшысы болған. Сол атыста 23 жастағы әйел қаза тапқан. Спирс өз арызында қате ақпарат оған эмоционалдық күйзеліс әкелгенін және оны мәңгілікке кісі өлтірумен байланыстырғанын мәлімдеген.
The New York Times газеті бұл үкім туралы мақаласында соңғы 50 жыл ішінде АҚШ-та өз мақаласы үшін жала жабу туралы сот ісін бірінші рет жоғалтқанын жазды.