Жер шарындағы теңіз бетінің қатты жылынуы және Эль-Ниньо климаттық құбылысының шарықтау кезеңі 2027 жылы жаһандық температураның рекордтық деңгейге жетуіне әкелуі мүмкін. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
Бұл туралы РИА Новостиге австралиялық ARC "XXI ғасырдың ауа райы" озық зерттеулер орталығының қызметкері, климатолог Андреа Тащетто мәлімдеді. "Қазіргі уақытта әлемдік мұхиттың беткі қабатының температурасы өте жоғары. 2026 жылдың мамыры теңіз бетінің жаһандық температурасы бойынша ең жылы ай ретінде тіркелді", – деді Жаңа Оңтүстік Уэльс университетінің доценті.
Тащеттоның айтуынша, Эль-Ниньо құбылысы өзінің ең жоғары кезеңінен кейін жаһандық орташа температураны арттырады. Бұған Солтүстік Атлантиканың тропикалық бөлігінде және Үнді мұхитында температураның жоғарылуы да ықпал етеді. "Сондықтан келесі жылы жаңа жаһандық температуралық рекорд орнаса, бұл таңғаларлық жағдай болмайды", – деп қосты ол.
Эль-Ниньо – Тынық мұхитының экваторлық бөлігіндегі су температурасының қалыпты деңгейден айтарлықтай жоғарылауымен сипатталатын табиғи құбылыс. Мұндай жылыну мұхит пен атмосфера арасындағы өзара байланысты өзгертіп, бүкіл әлем бойынша климаттық өзгерістер тізбегін туындатуы мүмкін. Соның салдарынан кейбір өңірде құрғақшылық қаупі күшейсе, басқа аймақтарда қатты жауын-шашын болуы мүмкін.