Еуразия даму банкі (ЕАДБ) Қазақстан экономикасы 2026 жылы да тұрақты өсімін сақтап, жалпы ішкі өнім 5,5%-ға өседі деп болжады. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
Сарапшылардың айтуынша, экономикалық өсімге мемлекеттік өнеркәсіп саясаты аясында 200 инвестициялық жобаның іске қосылуы, сондай-ақ Ұлттық инфрақұрылымдық жоспардың жүзеге асырылуы оң әсер етеді. Сонымен қатар мұнай бағасының жоғары деңгейде сақталуы мен Ұлттық банктің базалық мөлшерлемені біртіндеп төмендетуі де экономиканың дамуына қолдау көрсетеді.
ЕАДБ болжамынша, 2026 жылдың соңында инфляция 9,7%-ды құрайды. Баға өсімінің баяулауына мынадай факторлар ықпал етеді: пайыздық мөлшерлемелердің жоғары деңгейде сақталуы; теңге бағамының нығаюы; мемлекет реттейтін тауарлар мен қызметтер бағасының өсуін шектеу.
Сарапшылардың бағалауынша, Ұлттық банктің базалық мөлшерлемесі 2026 жылдың соңына қарай 16% деңгейінде болады. ЕАДБ мәліметінше, 2026 жылы АҚШ долларының орташа жылдық бағамы шамамен 490 теңге болады. Теңге бағамының тұрақтылығына: теңгемен шығарылған қаржы құралдарының жоғары табыстылығы; мұнай бағасының жоғары болуы; шетелдік инвесторлардың мемлекеттік бағалы қағаздарға қаржы салуы әсер етеді.