Қазақстанда 24 маусымда 2012 жылғы үлгідегі 2000 теңгелік банкнотаның параллель айналыс мерзімі аяқталады. Бұл туралы Qazaqyia.kz порталы Kursiv Media басылымына сілтеме жасап хабарлайды.
Келесі аптадан бастап бұл купюраны төлем құралы ретінде қабылдау тоқтатылады. Ұлттық банк параллель айналыс мерзімі аяқталғаннан кейін екінші деңгейлі банктер мен «Қазпошта» ескі үлгідегі банкноталарды жаңаларына үш жыл бойы айырбастайтынын еске салды. Ұлттық банк филиалдарында мұндай айырбас мерзімсіз жүргізіледі.
Бұған дейін 2012 жылғы үлгідегі 10 000 теңгелік банкнотаны маусым айының соңында параллель айналыстан шығару жоспарланған болатын. Алайда кейін оның айналыс мерзімі 2027 жылдың шілдесіне дейін ұзартылды.
«2000 және 10 000 теңгелік банкноталардың параллель айналысын бір мезгілде аяқтау банк жүйесіне жүктеме тудыруы мүмкін. Сондықтан мерзімді ұзарту адамдар мен бизнеске ескі банкноталарды жаңаларына біртіндеп және ыңғайлы ауыстыруға көмектеседі, сондай-ақ ескі үлгідегі банкноталардың табиғи тозуын қамтамасыз етеді», — деп түсіндірді Ұлттық банкте.
Бұған дейін «Курсив» Қазақстанда цифрлық теңге үшін нормативтік-құқықтық базаны қалыптастыру аяқталғаны және оны енгізу бойынша келесі қадамдар анықталғаны туралы хабарлаған болатын.